Кога ќе добиеш договор за работа во Германија, најчесто чувството е исто: олеснување. По сите нервози, документи и чекања, мислиш дека конечно си на сигурно. Но тука многумина грешат. Arbeitsvertrag не значи автоматски заштита, особено во првите месеци.
Една од работите што ретко некој ти ја објаснува е пробниот период, таканаречениот Probezeit. Во најголем број договори тој трае до шест месеци. Во тој период, работодавецот може да те отпушти речиси без никакво образложение и со многу краток отказен рок. Не мора да си направил грешка, не мора ни да има конкретна причина. Доволно е да проценат дека „не си тоа што го барале“. Во тој момент, правната заштита што ја очекуваш – едноставно не постои.
Дополнителен проблем на кој малкумина мислат е боледувањето на почетокот од работата. Ако се разболиш во првите неколку недели, ситуацијата може да биде многу поразлична од тоа што го замислуваш. Работодавецот не е должен веднаш да ти исплаќа плата, а исплатата зависи од тоа дали си правилно пријавен во здравственото осигурување и дали целата документација е средена навреме. Ако има грешка или задоцнување, можеш лесно да се најдеш без приходи токму кога најмногу ти требаат.
Прочитајте: Парични надоместоци во Германија кои по закон треба да ги добивате
Многу луѓе веруваат дека ако останат без работа, автоматски ќе добијат надомест од државата. Но и тука реалноста е поинаква. За да имаш право на Arbeitslosengeld I, потребно е да имаш најмалку една година стаж во одреден период. Ако си нов во Германија или често си менувал работа, можеш да се најдеш во ситуација каде што нема да добиеш ништо веднаш, туку ќе мораш да поминеш низ дополнителни постапки и проверки.
Уште една честa грешка е слепо верување во тоа што ти било кажано усно. Во Германија, договорот е закон. Ако нешто не е јасно напишано во него, практично не постои. Работно време, прекувремена работа, отказен рок или времетраење на договорот – сè што не е црно на бело, не може да се бара подоцна. Многумина тоа го сфаќаат дури кога ќе настане проблем.
Најопасниот момент е кога луѓето потпишуваат договор без целосно да го разберат, од страв да не ја изгубат работата. Тој страв често подоцна се плаќа со отказ, финансиски притисок и проблеми со институции како Ausländerbehörde. Еден потпис може да има далекусежни последици.
Прочитајте: Боледување во Германија: кој плаќа, колку трае и колкава е исплатата
Затоа, пред да потпишеш, секогаш земи време да го прочиташ договорот. Прашај за условите, за пробниот период, за осигурувањето. Побарај копија и не се срами ако нешто не ти е јасно. Подобро е да задоцниш еден ден со потписот, отколку со месеци да ги решаваш последиците.
Arbeitsvertrag во Германија не е гаранција за сигурност – барем не на почетокот. Но информиран работник е работник што знае да се заштити.
Сподели ја оваа статија со некој што штотуку почнува да работи во Германија. Можеби токму оваа информација ќе му заштеди многу проблеми.
Текстот е авторска сопственост и неговата содржина не смее да се превзема во целост или делови без претходна согласност од авторот или порталот Емигрико.
