На Покраинскиот суд во Минхен беше изречена пресуда во еден од најгласните корупциски случаи што во последните години го потресоа градскиот управен орган задолжен за странци. Двајца поранешни вработени во Kreisverwaltungsreferat (KVR) беа прогласени за виновни за примање мито, додека третиот обвинет – посредникот кој ги организирал нелегалните услуги – беше осуден на повеќегодишна затворска казна.
Судот заклучи дека незаконските дејствија се одвивале систематски, со свесно прекршување на службените овластувања и директна финансиска корист за вклучените лица.
Условни казни за поранешните службеници на KVR
Поранешните службеници на KVR, Михаел Т. (50) и Шкурте Х. (27), кои работеле во одделот за странци, беа осудени пред Покраинскиот суд Минхен I за примање мито. Двајцата добија казна од една година и девет месеци затвор, но извршувањето на казната е условно одложено. Дополнително, судот им наложи по 180 часа општокорисна работа.
Прочитајте: Зошто Германец со истата плата живее подобро од Македонец?
Според утврдените факти, Михаел Т. нелегално издавал таканаречени фиктивни потврди на странски државјани, за што примил 700 евра. За време на судењето ја признал вината и изјавил дека времето поминато во притвор му било најтешкото искуство во животот.
Шкурте Х. примала пари за незаконски пријави на живеалиште. Вкупно, според пресудата, примила 1.400 евра во готово од посредникот, а примопредавањата се одвивале делумно во просториите на KVR, а делумно на паркинг пред една продавница.
Посредникот осуден на речиси три години затвор
Третиот обвинет, Арбен А. (28), кој се претставувал како лице што им помага на странци при добивање визи и работни дозволи, беше осуден на две години и девет месеци затвор. Пресудата сè уште не е правосилна.
Прочитајте: Германија ги проверува банкарските сметки: што значи ако банката ти побара објаснување за пари?
Судот го прогласи за виновен за давање мито, како и за злоупотреба на титули, службени ознаки и професионални називи. Утврдено е дека од клиенти наплаќал околу 3.000 евра за нелегален престој, иако во обвинението првично се споменувале значително повисоки износи.
За време на судењето, дел од обвиненијата беа отфрлени, вклучително и наводната измама од 10.000 евра, поради што одбраната побара поблага, условна казна. Судот го одби тоа барање и изрече безусловна затворска казна.
Сите обвинети ја признале вината
Според наводите на судот, сите тројца обвинети во целост ги признале кривичните дела. Признанијата биле земени како олеснителна околност, но судот нагласи дека станува збор за сериозно нарушување на довербата во јавната администрација, особено во област која директно влијае врз правниот статус и егзистенцијата на странските државјани.
Пошироката истрага во KVR продолжува
Овој судски процес е само дел од пошироката истрага за корупција во рамките на Kreisverwaltungsreferat Минхен. Според информациите од Државното обвинителство во Минхен, во моментов се водат два одделни истражни процеси.
Во првиот, во кој спаѓа и овој случај, се истражуваат уште шест дополнителни осомничени лица. Во вториот истражен процес, постапка се води против четири лица, меѓу кои и една поранешна вработена во KVR. Истрагите се во тек, а можноста за нови обвиненија засега не е исклучена.
Случајот повторно го отвори прашањето за надзорот во градската управа и за безбедносните механизми во постапките поврзани со дозволи за престој и работа на странци во Минхен и пошироко во Германија.
Што значи ова за странците во Германија?
Овој случај е јасен сигнал дека германските институции сериозно ги контролираат службите за странци и дека корупцијата, дури и кога постои, се открива и строго се казнува.
За странците ова значи неколку важни работи:
Нелегалните „услуги“ се ризик што може скапо да ве чини.
Луѓето што нудат „средување дозволи“, фиктивни пријави или „врски во KVR“ не ве штитат – напротив, ве ставаат во опасност од губење на престој, забрана за влез и кривична одговорност.
Секој документ може да биде повторно проверен.
Иако во овој случај се осудени службениците, институциите имаат право да ги преиспитаат сите дозволи издадени по сомнителна постапка. Тоа значи дека и странците кои користеле такви услуги можат да бидат повикани на проверка.
Германија не толерира „снаоѓање“.
Она што во некои земји поминува како „врска“ или „услуга“, во Германија е кривично дело – без разлика дали си службеник или странски државјанин.
Легалниот пат е побавен, но најсигурен.
Овој случај покажува дека системот, иако строг, функционира: службеници се осудени, посредник оди во затвор, а истрагата продолжува. Тоа значи дека долгорочно само легалниот пат нуди сигурност.
Порака за странците:
Ако некој ви нуди „брзо средување“ на престој, работа или пријава – тоа е црвено знаме 🚩. Подобро е да чекате и да аплицирате по закон, отколку подоцна да се соочите со сериозни последици.
Текстот е авторска сопственост и неговата содржина не смее да се превзема во целост или делови без претходна согласност од авторот или порталот Емигрико.
