Германија сака да спречи ширење на мутации на корона вирусот со гранични контроли и строги правила за влез во земјата.
Словачка е трета земја која од страна на германската влада неделава е прогласена за подрачје со особено опасни мутации на корона вирусот. Тоа значи дека авиокомпаниите, железницата и автобуските компании веќе не смеат да превезуваат патници од Словачка во Германија. Исклучок се германски државјани и странци кои живеат во Германија.
Со ова Словачка им се приклучи наЧешка и Австрија (регионот Тирол) на списокот соседи на Германија од каде од утре ќе смеат да влезат само одредени категории луѓе. Според наводите на германската влада, во случајот на Чешка и Тирол, влез ќе биде дозволен за Германците, странците со живеалиште и престој во Германија, сезонски работници во земјоделството и медицински персонал. За забраната за влез на другите граѓаните да може да се спроведе, од утре ќе почнат контроли на границите со овие земји.
Министерството за внатрешни работи вчера соопшти дека во Германија ќе може да влезат и брачните партнери, животните придружници, малолетните деца и родители на малолетни деца, но само ако тие заедно ја минуваат границата со германските роднини. Од забраната се исклучени и возачите на камиони и друг персонал во транспортот на стоки. Треба да биде дозволен влез и од ургентни хуманитарни причини, како на пример смртен слуај. Сепак, во сите случаи кои се сиклучок од забраната, важат правилата за тестирање и карантин.
Европската комисија претходно апелираше до Германија да дозволи исклучоци за луѓето кои патуваат до работното место, но министерот за внатрешни работи Хорст Зехофер тоа категорично го исклучи. Тој рече дека германската влада нема само немо да посматра „како мутацијата на вирусот се префрла кај нас“. Граничните контроли се болни, но во моментов се неизбежни.
