Во Германија, која е една од најбогатите земји во светот – секој шести граѓанин е на работ на сиромаштија.
Кои луѓе припаѓаат на сиромашните слоеви во Германија и колку пари се потребни за да се преживее и живее во оваа земја?
Бездомници спијат на улица, мајки се откажуваат од оброците за да направат повеќе за своите деца, пензионери кои бараат пластични шишиња во контејнерите.
Иако Германија со 83 милиони жители е една од најбогатите земји во светот, 13,8 милиони луѓе овде во земјата се на работ на сиромаштија или живеат во сиромаштија.
Ова се податоците од сегашниот извештај за сиромаштијата, кој еднаш годишно го објавува германската чадор организација на доброволни даватели на социјална и медицинска нега (der Paritätische Wohlfahrtsverband).
И германската влада, во својот извештај за сиромаштијата, го забележува растечкиот јаз меѓу богатите и сиромашните.
Тоа не значи дека луѓето во Германија умираат од глад или студ бидејќи никој не им помага или дека умираат од болест затоа што немаат пристап до медицинска нега.
Во социологијата постои разлика помеѓу апсолутната сиромаштија, кога луѓето не можат да ги задоволат своите основни потреби, и релативната сиромаштија, која се мери со просечните услови за живот на едно општество.
Нерамномерна распределба на богатството и сиромаштијата
Минатата година Германија беше на 20-та позиција на светската листа на богатство. Критериум е бруто домашниот производ по глава на жител.
Во Германија таа вредност е 50.700 американски долари. На прво место е Луксембург со 136.000 американски долари по глава на жител.
Десетте најсиромашни земји во светот се наоѓаат во Африка, а најсиромашна е Бурунди со 270 американски долари бруто домашен производ годишно по глава на жител.
Сиромаштија – прашање на дефиниција
Додека во најсиромашните земји во светот луѓето обично живеат во апсолутна сиромаштија, луѓето во Европа генерално се погодени од релативна сиромаштија.
Тие мора да живеат со значителни материјални ограничувања.
Во Европската унија, секој што има помалку од 60 отсто од просечниот месечен расположлив приход е или во ризик од сиромаштија или сиромашен.
Ако некој има помалку од 50 проценти од просечниот приход, тогаш е многу сиромашен.
Во Германија, сиромашните кои примаат помалку од 1.148 евра месечно се сиромашни.
Самохраните мајки со мало дете се сиромашни кога добиваат помалку од 1.492 евра, а родителите со две деца се сметаат за сиромашни доколку имаат приходи под границата од 2.410 евра.
Сиромаштија и покрај обезбедувањето основни потреби
Германија се дефинира себеси како држава на благосостојба. Оние кои не можат да најдат работа или се неспособни за работа, а немаат приходи добиваат основна социјална помош.
Колоквијално се нарекува Харц IV. Добивате пари за трошоци за живот, а трошоците за кирија, парно, вода и здравствено осигурување ги покрива државата.
Во 2020 година, 5,3 милиони луѓе живееле на овој начин во Германија – со делумен или целосен пакет помош Харц IV.
Оние кои сами воспитуваат дете добиваат 449 евра месечно. Овие пари мора да се искористат за плаќање храна, облека, средства за хигиена, интернет, телефон и струја, како и сите други трошоци за домаќинството. Ако во заедницата живеат двајца сиромашни, тогаш добиваат по 404 евра.
Но, за секое дете во зависност од возраста се плаќа меѓу 285 и 376 евра.
Колку му треба на човекот за да живее?
Организациите кои работат на помош на сиромашните постојано наведуваат дека основната социјална сигурност не ја спречува сиромаштијата и не е доволна за вистинско учество во животот.
Владата има намера да ги зголеми основните расходи за сиромашните од 2023 година. Тогаш основната помош ќе изнесува 502 евра.
Кристоф Бутервеге, социолог кој се занимава со сиромаштија, смета дека тоа нема да биде доволно. Тој смета дека 650 евра се најмалата сума која гарантира „достоинствен живот“ и нормална, здрава исхрана.
Основната сума е навистина резултат на блиска пресметка. Храната чини пет евра по лице на ден.
„За да биде доволно, сиромашните домаќинства често купуваат помалку храна или купуваат намирници со послаб квалитет“, се вели во минатогодишната анализа на Фондацијата Хајнрих Бол.
Фондација блиска до Зелените го користи терминот нутритивна сиромаштија во овој контекст.
Тешко им е и на пензионерите
Инфлацијата ги влошува работите, па на ризик се и оние на кои досега не им требаше помош.
Се повеќе има луѓе кои не можат да ги платат зголемените цени на лебот, млекото, зеленчукот и овошјето во супермаркетите.
Ова може да се види и на 960-те места во Германија каде што организацијата Тафел (маса) собира и дистрибуира до сиромашните прехранбени производи кои се во добра состојба, но наскоро ќе истечат.
Во 2020 година овие услуги ги користеле 1,1 милион луѓе, а во меѓувреме ги има два милиони.
