На историските места во Грција високите потпетици се забранети, на автопатите во Германија не смеете да останете без гориво, а на Хвар пиењето на јавни места може да ве чини и до 500 евра.
Некои закони се донесени во поново време и за нив сигурно има добра причина, без разлика што ни звучат лудо. Некои чудни закони, пак, си останале од порано и никој не се сетил да ги регулира или промени.
Доколку планирате да одите во некоја од европските земји, добро би било да ги знаете и чудните закони:
Забрането е да останете без гориво на автопат во Германија
Доколку некогаш се најдете на пат низ германските автопати, запомнете дека мора да го наполните резервоарот со гориво.
Казните за снемување гориво во автомобилот на германски автопат се од 30 до 70 евра, затоа што Германците сметаат дека не може ненадејно да се случи да останете без гориво, туку тоа е ситуација што може да се спречи.
Друга причина за овој закон е и забраната да се застане среде автопат – нешто што ќе се случи ако останете без гориво.
Во Венеција е забрането да храните гулаби
Од 2008 година, властите во Венеција воведоа забрана за хранење гулаби на плоштадот Свети Марко.
Ваквата забрана била воведена со цел да се намали популацијата на гулабите, но и за да се намалат трошоците за чистење на јавните површини, за кои секој граѓанин плаќал по 275 евра годишно.
За хранење гулаби во Венеција можете да платите казна и до 700 евра.
Во Грција е забрането да носите високи потпетици на историските места
Доколку планирате да одите во Грција и да ги посетите историските споменици, бидете сигурни дека со вас носите соодветни чевли.
Од 2009-та година во земјата е донесен закон со којшто се забранува да се носат високи потпетици на историските места за да не се оштетуваат.
Мечето Вини Пу е забрането во Полска
Ако ја погледнете уште еднаш слатката слика на мечето Вини Пу, ќе забележите дека не носи пантолони, а поради ова од 2014-та година во некои градови во Полска неговите слики се забранети.
Во Франција мажите не смеат да носат шорцеви за бањање на базените
Во Франција, доколку планирате да посетите базени или водени паркови, тогаш задолжително со себе понесете и костими за капење.
Шорцевите за капење се забранети затоа што наликуваат на нормална облека и може да ги носите и за извршување на други активности. Така, нечистиотијата од надвор ќе ја внесете и во базенот.
Во Британскиот парламент не смеете да влезете со витешки оклоп
Можеби ви звучи смешно, но овој закон датира од 1313-та година. А, со оглед на тоа што мошне често луѓето денес носат витешки оклопи, навистина Британците мораат да побрзаат за да го променат овој закон, нели?
Во Барселона не смеете да се шетате без маица
Освен ако не сте на плажа или на базен, низ Барселона можете да се шетате само облечени во целост.
Од 2011-та година градските власти донесоа ваков закон, а казните за шетање без маица може да изнесуваат и до 260 евра.
На Хвар јадењето и пиењето на јавни површини чини 700 евра
Слично како и во Барселона, така и на хрватскиот остров Хвар е забрането да се шетате во костими за капење. Казната за оние што не ги почитуваат законите може да изнесува и до 600 евра.
Доколку, пак, се обидете да се шетате само по кратки пантолони или здолниште без маица, казната е 500 евра.
Доколку се обидете да јадете или да пиете на јавните површини, можете да платите казна и до 700 евра, а исто толкава е и казната за излежување на улиците.
Во село во Франција не смеете да умрете ако претходно не сте купиле гробница
Во француското село Сарпурен жителите не смеат да починат во неговите граници доколку претходно не обезбедиле гробно место на локалните гробишта.
Законот бил донесен во 2008-мата година, откако било утврдено дека гробиштата се преполни.
Во Рим ако имате куче мора да го прошетате
Италијанските градови воведоа закони со кои се штитат милениците од насилство. Така, доколку во Рим не го прошетате кучето трипати дневно, можете да платите казна од 500 евра, а истото важи и во Торино.
Во Торино се воведени и казни од 10.000 евра или година дена во затвор за мачење или напуштање миленичиња.
Во Португалија е забрането уринирање во океанот
Со цел да ги чуваат плажите чисти, а и за да се заштити здравјето на луѓето, Португалија воведе закон со кој се забранува уринирање во океанот.
Иако, не сме сигурни како ќе докажат дека некој не го почитувал законот, сепак подобро е да одите во тоалет како сите цивилизирани луѓе.
