Германскиот Бундестаг се изјасни за разлабавување на рестрикциите за вакцинираните и лицата кои прележале Ковид-19.
За целосно вакцинираните, значи оние кои добиле две дози, или во случајот со вакцината на Џонсон и Џонсон една доза, и за лицата кои прележале Ковид-19 и оздравеле, треба да отпаднат многу од корона-рестрикциите кои во моментов важат во Германија.
Бундестагот денеска со големо мнозинствo гласаше „за“ уредбата предложена од Владата. Уредбата доби зелено светло од пратениците на ЦДУ, ЦСУ, СПД, Зелените и Левицата, воздржани беа Либералите, а против беа пратениците на деснопопулистичката АфД.
Доколку за разлабавување на мерките за вакцинираните и оздравените утре гласа и Бундесратот, тогаш тие веќе од викендот ќе можат да уживаат во активности кои досега им беа резерврани само на оние кои приложиле негативен корона-тест.
На целосно вакцинираните и оздравените лица веќе нема да им биде потребен негативен тест кога одат на купување, на фризер или во посета на ботаничка градина, на пример. Исто така за нив отпаѓаат и ограничувањата на движењето. Но, сепак, и натаму ќе мора да носат маски и да држат пропишано растојание.
Освен тоа, вакцинираните и оздравените ќе може да се среќаваат без ограничувања. На средбите со други лица тие нема да се бројат. На пример, во региони со висока стапка на зараза две невакцинирани лица ќе може да се среќаваат со неограничен број вакцинирани лица. И обврската за карантин за луѓето кои доаѓаат од странство во принцип нема да важи за вакцинираните и оздравените, освен ако контакт-лицето е заразено со варијанта на вирусот која во Германија сѐ уште ја нема, а која ја има „загрижувачки својства“. Обврската за карантин ќе важи и натаму за лицата кои доаѓаат од региони каде се раширени варијанти на коронавирусот.
За повеќе вакви и слични содржини придружете ни се во нашата фејсбук група Македонци во Германија.
