Трошоците за живот во Германија минатата година се зголемени за 7,9 отсто. Ваква годишна стапка на раст на потрошувачките цени не е забележана од основањето на Сојузна Република Германија во 1949 година. Иако инфлацијата забави во декември, годишното салдо е неповолно поради претходниот остар скок на цените на енергијата и храната, констатира во вторникот Државниот завод за статистика во своите првични проценки, пишува dpa.
За минатомесечното забавување, според податоците на статистичките институти во земјава, придонесе и еднократната итна помош со која државата во декември ги ослободи потрошувачите на гас и парно.
Потрошувачките цени во декември се повисоки за 8,6 отсто во однос на истиот месец лани. Инфлацијата во ноември и натаму е двоцифрена и изнесува 10 отсто – во октомври таа изнесуваше рекордни 10,4 отсто. Од ноември до декември 2022 година, потрошувачките цени паднаа за 0,8 отсто.
Цените на енергијата и храната растат со месеци. Нападот на Русија врз Украина и тесните грла за снабдување ја влошија и онака напнатата ситуација.
Во декември, потрошувачите во Германија мораа да издвојат 24,4 отсто повеќе пари за енергетски производи отколку една година порано. Цените на храната скокнале за 20,7 отсто за една година.
Германија се обидува да ги растерети компаниите и потрошувачите со субвенции во вредност од милијарди евра. Годинава ограничувањето на цените на струјата и бензинот треба да ги ублажи последиците од поскапувањата за граѓаните и компаниите.
Економистите претпоставуваат дека тоа ќе ја забави инфлацијата, но нема индикации дека цените ќе паднат посилно. „Инфлацијата е висока и може постепено да се намалува“, изјави неодамна претседателот на Бундесбанк, Јоаким Нагел.
Европската централна банка (ЕЦБ) од летово се обидува да ја олади инфлацијата во еврозоната со зголемување на каматните стапки, бидејќи доколку поскапат кредитите, побарувачката се забавува. На овој начин може да се потисне високата стапка на инфлација. Сепак, повисоките каматни стапки се товар за економијата веќе ослабена од војната.
По четири последователни зголемувања на каматните стапки во изминатата година и основната каматна стапка од 2,5 отсто, ЕЦБ не гледа крај на борбата против рекордно високата инфлација. „Ни претстои долг пат“, рече претседателката на ЕЦБ Кристин Лагард во средината на декември, пренесува Fenix Magazine.
