Многу луѓе се загрижени за претстојната рецесија, и лесно е да се разбере зошто. Зголемената инфлација, зголемените цени, проблемите со синџирот на снабдување, нестабилноста на глобалниот пазар и недостигот на работна сила доведоа многу финансиски експерти да објават дека уште една рецесија е практично зад аголот.
Финансиската планерка Хана Хорват пишува во нејзиниот авторски текст за лични финансии за Инсајдер дека не е лесно да се предвиди точното време кога економските услови би можеле да се влошат, но добрата вест е што рецесијата сè уште не започнала. Според неа, ова значи дека сега е најдоброто можно време да ги подготвите вашите пари.
Еве ги нејзините совети како да останете чекор понапред и да ги заштитите вашите финансии од рецесија.
Размислете каде можете да ги намалите трошоците
Многу работи станаа поскапи во последно време – бензин, храна, автомобили, мебел – што значи дека сега е добро време да го преиспитате вашиот буџет и да идентификувате што би можеле да намалите.
Буџетот на домаќинството може да се ревидира и менува како што се менуваат вашите потреби. Најлесно е да се откажете од услугите или купувањата без кои можете да живеете – да размислувате за вечери или услуги за стриминг, но тоа не значи дека треба да ги прекинете сите работи што ви носат радост.
Да се одлучи дали нешто е потреба или желба не е секогаш црно-бело. Некои работи може да изгледаат неважни за некои луѓе, како што е членството во теретана, додека други не можат да живеат без нив. Се работи за балансирање на вашите моментални приоритети и долгорочни цели.
Почнете да правите резерви за „црните денови“, ако веќе не сте
Рецесија или не, треба да имате фонд за итни случаи. Овие заштеди ви помагаат да избегнете позајмување пари за покривање на неочекувани трошоци како што се поправки, медицински третмани или губење на работа.
Итни случаи се токму тоа – неочекуваното. И многу луѓе се неподготвени за нив. На пример, дури 25 отсто од Американците велат дека воопшто немаат таканаречени „итни заштеди“.
Ако штотуку почнувате, се препорачува да создадете фонд кој може да покрие околу шест месеци трошоци, што ја вклучува сумата што ја трошите за основни работи како што се кирија, комунални услуги и намирници. Таа бројка може да изгледа голема на почетокот, но малите распределби со текот на времето можат да ги зголемат заштедите што ви се потребни.
Платете ги долговите со високи камати што е можно поскоро
Последното нешто со кое сакате да се справите за време на рецесија е долгот со висока камата што ве оптоварува. Долгот на кредитни картички треба да биде првиот на вашата листа што ќе се исплати, особено кога централните банки веројатно ќе продолжат да ги зголемуваат своите референтни каматни стапки. Овие каматни стапки влијаат на краткорочното кредитирање како кредитни картички. Со други зборови, каматата на вашата кредитна картичка може да се зголеми уште повеќе.
Откако ќе ги исплатите долговите, ќе имате простор во вашиот буџет за други работи, како што е зголемување на фондот за итни случаи или надоместување за зголемените потрошувачки цени.
Размислете за вашата кариера
Рецесиите традиционално одат рака под рака со зголемената невработеност – што значи дека е од суштинско значење подготовката на вашата кариера за следниот чекор.
Сега е време да се посветите на вмрежување и да продолжите да одржувате врски со луѓето кои работат во вашата област. Високото образование обично значи пониски стапки на невработеност, па ако сте размислувале да се вратите на училиште или да посетувате дополнителни курсеви, можеби сега е вистинското време. Стекнувањето нови вештини или зајакнувањето на постојните може да ви даде предност на идниот, потежок пазар на труд.
Исто така, се препорачува да бидете практични за индустријата што ќе ја изберете. Ниту еден бизнис не е целосно отпорен на рецесија, но одредени индустрии се побезбедни кога економијата опаѓа.
Смирете се и продолжете
Рецесијата може да биде емотивно и стресно време, особено кога станува збор за инвестиции. Гледањето како вашето портфолио паѓа во минус може да биде загрижувачко искуство, но важно е да се избегнат реакциите на „првата топка“.
Ако навистина сакате да преземете нешто пред следната рецесија, препораката е едноставно да преиспитате и ребалансирате некои од вашите инвестиции. Диверзифицираното портфолио може да ви помогне да ги минимизирате загубите за време на нестабилни пазарни времиња. Запомнете: ако веќе имате разновидно портфолио, удвојувањето на вашиот план и фокусирањето на долг рок е една од најдобрите работи што можете да ги направите за вашите пари.
Нема сомнение дека самата помисла на рецесија може да предизвика вознемиреност. Но, планирањето однапред и преземањето правилни чекори за подготовка може да ви помогне подобро да ја контролирате вашата ситуација и да намалите дел од стресот, советува Хана Хорват.
