Само неколку дена откако Германија извести за највисока инфлација во последниве децении (со февруарскиот тренд CPI расте со годишно темпо од 7,6% и ги надмина сите очекувања), Германците се подготвуваат за нов црковен шок.
,,Во понеделник, Германија ќе направи еден чекор кон враќање на страшната вајмарска хиперинфлација, кога според Германското здружение за малопродажба (HDE), потрошувачите треба да се подготват за уште еден бран поскапувања за секојдневните стоки и намирници, а Ројтерс објави дека цените во германските трговски синџири ќе експлодираат помеѓу 20 и 50%”, пишува порталот zerohedge.com кој е специјализиран за финансии и бизнис.
Дури и пред избувнувањето на војната во Украина, цените се зголемија за околу пет отсто „ширум асортиманот на производи“ како резултат на зголемените цени на енергијата, изјави претседателот на ХДЕ Јозеф Санктјохансер во петокот за „Ноје оснабрикер цајтунг“.
Со оглед на тоа што руската инвазија посилно ги погоди економиите и синџирот на снабдување, на повидок е уште една серија на зголемувања на цените.
„Доаѓа вториот бран на поскапувања, и тој сигурно ќе биде двоцифрен“, предупреди Санктјохансер, цитиран од The Local.
Според претседателот на трговската асоцијација, првите малопродажни синџири веќе почнале да ги зголемуваат своите цени во Германија – а останатите најверојатно ќе следат.
„Наскоро ќе можеме да го видиме влијанието на војната рефлектирано во ценовните етикети низ сите супермаркети“, рече Санктјохансер.
Неодамна популарните трговски синџири како Алди, Едека и Глобус најавија дека ќе бидат принудени да ги зголемат цените. Во Алди, месото и путерот ќе бидат „значително поскапи“ од понеделник поради зголемувањето на цените од неговите добавувачи.
„Од почетокот на војната во Украина, имаше скокови во куповните цени што досега не сме ги доживеале“, објави во петокот портпаролот на Алди Норд.
Пред две недели Алди ги покачи цените на околу 160 артикли, а една недела подоцна поскапеа уште 20 артикли. Другите брендови на супермаркети брзо го следеа примерот.
