И покрај ширењето на новиот вид на коронавирус, инфлацијата, проблемите со снабдувањето, бизнисмените во Германија покажуваат невиден оптимизам во однос на очекувањата во деловната 2022 година.
Институтот за германска економија (IW) ја објави својата годишна прогноза во која се сумирани очекувањата на 48 професионални деловни асоцијации.
Истражувањето е спроведено во ноември во повеќе од 2.800 компании низ Германија, односно кога веќе се знаеше дека бројот на новозаразени лица повторно расте и дека се заканува нов вид на вирус.
„Уште тогаш се знаеше за порастот на цените и се посериозната инфлација, како и за тоа дека производството се уште е загрозено поради проблеми со снабдувањето. И се знаеше дека во Берлин има нова влада. Сето тоа се фактори кои повикуваат на претпазливост, но резултатите од истражувањето покажаа „широк оптимизам“ во буквално сите индустрии“, изјави Мајкл Хедер, директор на Институтот, пренесе Дојче веле (ДВ).
Тој дури го користи терминот „извонредна атмосфера на очекувања“, без разлика што разликите во очекувањата меѓу економските гранки се вообичаена работа: кога оптимизмот ќе го зафати самиот крај на економскиот синџир, на пр. туризмот и потрошувачката, потоа почетокот на синџирот, тешката индустрија и машинството, обично тонат во песимизам.
Голем исклучок, значи, е што скоро сите сега се оптимисти. Сепак, шест од 48-те стручни здруженија наведуваат дека денес се значително полоши од пред една година.
Ова се гранките на индустријата кои се најтешко погодени од пандемиските мерки.
Како пример, Хедер го наведува секторот што организира саеми.
Лани и годинава беа откажани 70 проценти од тие манифестации.
И бродоградбата беше сериозно погодена, особено крстосувачите, кои масовно беа нарачувани пред пандемијата.
Се појавија некои нови проблеми, на пример, во индустријата за хартија.
Работата од дома, но и се помалите тиражи на весници ги десеткуваа изворите на стара хартија за рециклирање …
Непосредна жртва на мерките против пандемијата секако е услужниот сектор, потсетува Хедер.
Но, и во споменатите стопански гранки речиси никој не очекува да биде полошо.
Нешто помалку оптимист е владата во финансискиот сектор, каде пред се се жалат на ниски маржи.
Во исто време, светот на парите станува дигитален, па неминовно ќе има повеќе затворања на класични филијали на банки.
Но, и банките забележуваат дека економијата е оптимистичка и дека се подготвуваат нови инвестиции, така што и финансискиот сектор го очекува подобри денови, барем преку кредитни зделки.
Најмал оптимизам има во градежниот сектор, но само затоа што таа индустрија не настрада премногу поради короната.
Хедер вели дека Германија релативно добро ја поминала оваа криза, барем кога станува збор за пазарот на трудот, и ја пофалува политиката која брзо и ефикасно им пружила помош на вработените кои морале да останат дома, што многумина спасило од отказ и одење под завод.
Вработувања ќе има: во 21 од 48 секторски здруженија велат дека догодина ќе им требаат повеќе луѓе.
Ова важи за фармацевтската, металната и електроиндустријата, за шпедицијата и информатиката, но и за лизинг и инвестицискиот сектор, исто како и во областа на маркетингот.
Покрај тоа, многу претприемачи веќе се прашуваат дали ќе можат да ги најдат луѓето што им се потребни.
Сепак, Хедер предупредува дека економскиот пораст „нема да дојде сам по себе“. Тоа треба да го поддржат и законодавците.
„Државата мора конечно да ја покаже својата способност за дејствување“, рече првиот човек на Институтот за германска економија.
Дури и по тоа прашање постои умерен оптимизам.
Сите знаат дека актуелниот германски канцелар Олаф Шолц, како министер за финансии во претходната влада, во голема мера е одговорен за мерките за поддршка на вработените за време на короната, што спаси и многу компании.
Од друга страна, познати се и целите на владејачката коалиција за заштита на климата, како и „огромните инвестиции“ кои се најавуваат во коалицискиот договор.
Во економијата може да се слушне дека новата коалиција знае дека нема да може да ги постигне тие цели доколку работите се одвиваат како досега.
Сега, затоа, од зборови треба да преминеме на дела, односно пари, а Хедер смета дека тоа коалицијата треба да го покаже што поскоро, наведува Дојче веле.
За повеќе вакви и слични информации придружете ни се во нашата фејсбук група Македонци во Германија
