Германските власти со помош на Европол го прекинале досега најголемиот синџир на измами преку повикувачки ткн кол-центри лоцирани во земјите од западен Балкан и во Либан, соопштено е во четвртокот.
„Истражните органи во Баден-Виртемберг успеаја да го откријат најголемиот случај на измама преку кол-центрите во Европа досега“, изјави министерот за внатрешни работи на сојузната покраина Баден-Виртемберг, Томас Штробл.
Според неговите информации, германските истражни органи со помош на Европол и локалните полициски сили на 18-ти април извршиле претреси во дванаесет кол-центри во Србија, Босна и Херцеговина, Косово и Либан и уапсиле 20 лица. Еден од центрите за повици бил лоциран во Нови Пазар во Србија.
Како што е соопштено, вработените во центрите за повици им се јавувале на луѓе во Германија на кои им се претставувале како членови на семејството, членови на владини служби или финансиски центри и изнудувале пари од жртвите користејќи различни методи. Криминалците барале пари од жртвите под изговор дека ќе извлечат роднина од неволја или се заканувале со казни за наводните прекршоци што ги направиле жртвите.
Измамите биле откриени откако вработен во банка забележал дека клиент сака да префрли 100.000 евра на непозната сметка во странство. Од декември досега истражителите снимиле над милион повици, а измама е извршена во 6.000 случаи, со штета од над 10 милиони евра.
„Овие криминални дела се особено гнасни и безмилосни бидејќи си поигруваат со стравовите и тешкотиите на луѓето“, рече Штробл и најави дека властите ќе дејствуваат против сторителите „со сите средства“ со кои располага владеењето на правото.
Во Германија редовно се откриваат случаи на измами преку телефон, каде жртви се претежно постари лица или лица со мигрантско потекло.
