Германскиот здравствен систем се наоѓа пред големи промени кои би можеле директно да погодат илјадници семејства, особено оние каде што работи само еден партнер. Според предлогот што доаѓа од Министерството за здравство, од 2028 година би можела да се укине досегашната пракса на бесплатно осигурување за сопружници без сопствени приходи.
Станува збор за дел од поширока реформа со која се обидува да се стабилизира финансиската состојба на законското здравствено осигурување, кое се соочува со сериозен дефицит во наредните години.
Нов придонес за сопружници без приходи
До сега беше можно еден партнер да работи, додека другиот да нема приходи, а сепак да биде бесплатно осигуран преку неговата полиса. Тој модел, кој со децении беше стандард во Германија, сега доаѓа во прашање.
Според новиот предлог, би се вовел дополнителен придонес од 3,5% на бруто приходот на вработениот партнер. Овој износ би се плаќал исклучиво во случај кога другиот партнер нема сопствена заработка, но сè уште е осигуран преку семејната полиса.
Прочитајте: ТВ претплатата во Германија оди на суд: Дали ќе ги добиете парите назад ?
Овој додаток се нарекува „солидарен придонес“, а државата го гледа како начин за поправедна распределба на трошоците во системот.
Кој нема да мора да плаќа
Иако станува збор за значајна промена, предвидени се и одредени исклучоци. Во тие случаи, бесплатното осигурување за сопружникот би останало на сила.
Тоа вклучува домаќинства со мали деца, конкретно ако во семејството има дете помладо од седум години. Исто така, исклучени се случаи каде што партнер се грижи за член на семејството на кој му е потребна нега, како и семејства со деца со инвалидитет.
Дополнително, лица кои веќе ја достигнале законската возраст за пензија нема да бидат опфатени со оваа промена.
Важно е да се нагласи дека оваа мерка не се однесува на децата – нивното осигурување и понатаму останува бесплатно.
Нови административни обврски
Покрај финансискиот дел, се планираат и промени во администрацијата. Осигурениците во иднина ќе мора редовно да ги пријавуваат сите промени што влијаат на статусот на семејното осигурување.
Тоа вклучува промени во вработувањето, работното време или грижата за членови на семејството. Целта е да им се овозможи на осигурителните компании подобра контрола и попрецизна пресметка на придонесите.
Зошто се воведува оваа мерка
Главната причина за оваа реформа е финансискиот притисок врз системот на здравствено осигурување. Проценките покажуваат дека до 2030 година може да се појави дефицит од дури 40 милијарди евра.
Покрај тоа, властите сакаат да поттикнат поголемо учество на пазарот на труд. Се смета дека бесплатното осигурување за сопружници во некои случаи делува како пречка за вработување.
Со воведување на дополнителниот придонес се сака да се мотивираат партнерите без приходи да пронајдат работа, дури и со скратено работно време.
Колку ќе ги чини семејствата
За многу семејства оваа промена значи конкретен финансиски удар. Дополнителните 3,5% на бруто приходот може да значат десетици или дури повеќе од сто евра месечно помалку во семејниот буџет.
Од друга страна, државата пресметува дека оваа мерка ќе донесе околу 2,2 милијарди евра годишно во системот.
Предлогот треба да се најде пред Владата кон крајот на април 2026 година, по што следува расправа во Бундестагот. До конечната одлука се можни измени, но веќе сега е јасно дека Германија се движи кон построг и поскап модел на здравствено осигурување.
Текстот е авторска сопственост и неговата содржина не смее да се превзема во целост или делови без претходна согласност од авторот или порталот Емигрико.
