Семејното насилство е сериозен општествен проблем што ги засега илјадници луѓе во Германија, без оглед на нивната националност, пол или статус на живеење. Доколку сте жртва или сведок на семејно насилство, важно е да знаете дека не сте сами и дека Германија има низа механизми за поддршка и заштита за засегнатите лица. Во оваа статија, нудиме детален водич за тоа како да пријавите семејно насилство во Германија, кого да контактирате, кои се вашите права и кои институции се вклучени во обезбедувањето помош.
Што е семејно насилство во Германија?
Семејното насилство (германски: häusliche Gewalt) не се однесува само на физичко насилство. Вклучува широк спектар на однесувања кои имаат за цел да контролираат, понижат, заплашат или повредат друго лице. Ова вклучува:
- Физичко насилство (удирање, давење, туркање итн.)
- Психолошко насилство (навредување, закани, изолација)
- Сексуално насилство (принуда за вршење сексуални дејствија без согласност)
- Економско насилство (одземање пари, забрана за вработување)
- Дигитално насилство (мониторинг, надзор преку мобилен телефон, уцена преку интернет)
Без оглед на формата на насилство, сите овие дејствија се нелегални и претставуваат основа за заштита и законско правно дејствување.
Прв чекор: Обезбедете ја сопствената безбедност
Доколку сте во опасност, веднаш јавете се во полиција на 110. Полицијата во Германија е должна да интервенира и да ја заштити жртвата. Во случај на посериозни форми на насилство, сторителот може привремено да биде отстранет од домот (т.н. Wegweisung), дури и ако е сопственик на имотот.
Полицијата може да контактира и со социјални служби, центри за советување и кризни центри за да ви обезбеди итна психолошка, правна и практична помош.
Прочитајте: РАЗВОД ВО ГЕРМАНИЈА
Каде да се пријави семејно насилство?
1. Полиција (Polizei)
Доколку насилството веќе се случило или постои непосредна закана, јавете се на 110. Полицијата може:
- Да интервенира и да ја заштити жртвата
- Да го отстрани сторителот од заедничкиот дом
- Да покрене кривична постапка
- Да го евидентира настанот за подоцнежна правна заштита
2. Советување и кризни центри (Frauenberatungsstellen, Frauenhäuser)
Во Германија постои мрежа од засолништа и советодавни центри за жени кои обезбедуваат:
- Сместување за жени и деца во итни случаи
- Правна помош и советување
- Помош во комуникацијата со властите и полицијата
- Психолошка поддршка
Најпознатиот портал за барање помош е www.hilfetelefon.de, кој е достапен 24/7 на неколку јазици (вклучувајќи хрватски, српски и босански).
Бесплатен телефон: 08000 116 016
3. Центри за социјална помош (Jugendamt, Sozialamt)
Доколку во семејството има малолетно дете, можно е да се контактира Jugendamt, кој е должен да ја заштити благосостојбата на детето. Тие исто така можат да помогнат во наоѓање алтернативен сместувачки капацитет и психолошка поддршка за детето.
4. Суд (Familiengericht)
За долгорочна правна заштита, може да се поднесе барање за:
- Налог за забрана за приближување (Näheverbot)
- Налог за забрана за контакрирање
- Привремено старателство над децата
- Исклучување на сторителот од заедничкиот дом
Овие мерки се издаваат според Законот за заштита од насилство (Gewaltschutzgesetz), кој ги штити жртвите и овозможува брза интервенција.
Што ако не зборувате германски?
Германскиот систем за заштита на жртвите обезбедува преведувачи и толкувачи во сите важни фази: од полицијата до судските постапки. Можно е да се зборува на некој од југословенските јазици на кризните линии како што е Hilfetelefon.
Многу советувалишта работат и со мигранти и се свесни за специфичните пречки со кои странците може да се соочат во постапката (на пр., недостаток на познавање на нивните права, страв од губење на живеалиштето, економска зависност).
Вашите права како жртва на насилство
Доколку сте жртва на семејно насилство во Германија, ги имате следниве права:
- Право на бесплатна помош и советување
- Право на правна заштита и застапување
- Право на привремено сместување
- Право на лична безбедност
- Право на заштита на децата
- Право на надомест на штета или отштета во одредени случаи
Доколку сте странски државјанин, насилството нема негативно влијание врз вашиот престој. Напротив, имате право на заштита како и сите други. Доколку сте дошле во Германија преку соединување на семејство како основа за престој, постојат правни механизми кои ве штитат дури и ако одлучите да се разделите од вашиот насилен партнер и нема да бедете депортирани или да ви биде одземена визата!
Документирање на насилството
Важно е да се документира секоја форма на насилство, дури и ако не планирате веднаш да го пријавите случајот. Ова може да вклучува:
- Фотографии од повреди
- Медицински наоди и дијагнози
- Пораки, е-пошта, закани
- Изјави од сведоци
- Полициски извештаи, доколку ги има
Документацијата може да биде клучна во подоцнежните правни процеси, од барања за заштита до развод и старателство.
Посебна заштита за жени и деца
Постои специјално развиен систем за жени и деца жртви на насилство:
- Безбедни куќи (Frauenhäuser) – локациите се тајни, само персоналот и корисниците имаат пристап
- Психолошка помош за деца – преку советодавни центри и специјализирани услуги
- Групно советување за жртви – обезбедува емоционална поддршка и чувство на заедница
Ниту една жена во Германија не мора да остане во злоупотребувачка врска од страв дека нема каде да оди. Системот постои и функционира.
Што после пријавата ?
Откако ќе пријавите малтретирање:
- Се поведуваат кривични или семејно – правни постапки
- Доколку е потребно, судот презема итни мерки (забрана за пристап)
- Жртвата добива поддршка во текот на целиот процес (правна и психолошка)
- Социјалните служби можат да помогнат со децата, сместувањето и финансиите
Доколку одлучите да се разведете, постапката се води преку Familiengericht. Во тој случај, насилството се зема предвид при одлучувањето за старателство, домувањето и имотот.
Текстот е авторска сопственост и неговата содржина не смее да се превзема во целост или делови без претходна согласност од авторот или порталот Емигрико.
