Многумина што живеат во Германија не се свесни дека обично симнување филм, серија или музика преку торент може да заврши со писмо од адвокатска канцеларија и барање за исплата на повеќе стотици, па дури и над илјада евра.
Посебно внимание треба да обрнете и кога ви доаѓаат гости од Македонија. Пред да им ја дадете лозинката за домашниот Wi-Fi, добро е да ги предупредите да не користат торент-програми за неовластено споделување содржини.
Причината е едноставна: ако преку вашата интернет-врска се споделува содржина заштитена со авторски права, токму вие како носител на договорот за интернет можете први да добиете адвокатско предупредување.
Зошто торентите се проблем во Германија?
Самата торент-технологија не е забранета.
Проблемот настанува кога преку BitTorrent или слични мрежи без дозвола се преземаат и истовремено се споделуваат филмови, серии, музика, игри или други дела заштитени со авторски права.
Прочитјте: Работи што никако не треба да ги правите во Германија: Некои грешки можат скапо да ве чинат
Кај многу торент-програми, додека преземате датотека, делови од неа автоматски се испраќаат и до други корисници.
Токму ова неовластено споделување е честата причина за таканаречените Abmahnung – адвокатски предупредувања поради повреда на авторски права.
Колку може да ве чини едно вакво писмо?
На фотографијата што ја споделуваме е прикажан германски судски документ од постапка поврзана со парично побарување.
Во него се наведени главно побарување од 1.000 евра, дополнителни трошоци и камати, со вкупен износ од 1.382,08 евра.
Ова не е универзална казна за користење торенти, ниту значи дека секој што ќе преземе филм ќе плати толку.
Во Германија носителите на авторски права можат да бараат надомест на штета и одредени адвокатски трошоци. Конечниот износ зависи од конкретниот случај, правната основа и евентуалната судска постапка.
Важно е да се знае и дека ваквите барања најчесто не се државни казни, туку граѓанскоправни побарувања.
Што ако торент користел вашиот гостин?
Ако пријател или роднина ја користи вашата интернет-врска и преку неа неовластено споделува филмови, можно е предупредувањето првично да пристигне на ваше име.
Но тоа не значи дека автоматски сте виновни или дека задолжително мора да платите.
Според германската судска практика, одговорноста зависи од тоа кој го извршил прекршувањето, кои лица имале пристап до интернетот и што може да се утврди за конкретниот случај.
Сопственикот на интернет-приклучокот не е автоматски одговорен за секоја постапка на полнолетен гостин.
Сепак, добивањето адвокатско писмо може да значи непријатна правна постапка и дополнителни трошоци.
Што ако добиете Abmahnung?
Најважно е да не го игнорирате писмото.
Но исто така не треба веднаш да платите или да потпишете изјава за престанок на прекршувањето (Unterlassungserklärung), без претходно да ја проверите.
Проверете кој го испратил писмото, за кое дело станува збор, кога наводно се случило прекршувањето и какви рокови се наведени.
Ако не сте сигурни што да направите, побарајте совет од Verbraucherzentrale или адвокат специјализиран за авторско право.
Особено сериозно треба да се сфати судски Mahnbescheid, бидејќи за поднесување приговор вообичаено постои рок од две недели од доставувањето.
Како да се заштитите?
Најсигурно е филмовите, сериите, музиката и игрите да ги користите преку легални извори или преку сервиси што имаат право да ја дистрибуираат содржината.
Ако ви доаѓаат гости, предупредете ги да не користат торент-програми за неовластено споделување заштитени содржини преку вашиот интернет.
Имајте предвид дека некои торент-програми можат да продолжат со споделување датотеки и кога корисникот активно не презема ништо.
Затоа, пред да ја дадете лозинката за Wi-Fi, кажете им на гостите едно едноставно правило: без нелегално споделување филмови, серии и музика преку торенти.
Една непромислена постапка може да ви донесе сериозни финансиски и правни проблеми.
Дали некогаш сте добиле Abmahnung во Германија поради симнување или споделување содржини од интернет? Споделете го вашето искуство.
Текстот е авторска сопственост и неговата содржина не смее да се превзема во целост или делови без претходна согласност од авторот или порталот Емигрико.
