Швајцарските домаќинства вработуваат половина од илегалните мигранти во земјата

Половина од илегалните имигранти во Швајцарија работа во домаќинствата, покажува една нова студија која проценува дека има околу 76.000 илегални мигранти во оваа земја.
„Нагласуваме дека ова е само проценка“, се вели во студијата. „Бројот на илегалци не може точно да се утврди, но веројатно е меѓу 50.000 и 90.000“.

Околу 43% од нив доаѓаат од Централна и Јужна Америка, 24% од европските земји надвор од ЕУ, во кои спаѓа и Македонија. Две третини од илегалците пристигнуваат во Швајцарија како туристи или без патни документи, додека пак една петтина останале во земјата и покрај тоа што им било одбиено барањето за дозвола за престој или азил.

Околу 28.000 илегалци живеат во Цирих, 13.000 во Женева, а 12.000 во кантонот Вауд. Само 600 живеат во кантонот Тичино каде официјален е италијанскиот јазик. Генерално, девет од десет возрасни илегални емигранти се вработени, а поголемиот дел од нив работат долги часови за ниски плати. Половина од илегалците работат во швајцарските домаќинства, а многу други се вработени во градежништвото и туризмот.

Работата во приватните домови на црно, е привлечна за многу илегалци, бидејќи на таков начин се чувствуваат повеќе заштитени, а тоа им овозможува и пофлексибилни обврски околу нивните деца. Оваа ситуација им оди во прилог и на швајцарските семејства, бидејќи имаат евтина работна сила. Освен во домаќинствата, илегалните мигранти работат и во малите бизниси, каде ризикот е помал, но со тоа и платите се помали.

Студијата се базира на информации од различни извори, вклучувајќи интервјуа со 60 експерти од 12 кантони, како и статистички податоци околу миграцијата. Слично истражување беше спроведено и пред десет години, кога според проценките, во Швајцарија имаше околу 90.000 илегални мигранти.

Ако ви се допадна статијата, а и за повеќе вакви и слични теми придружете ни се во нашата група Македонци во Швајцарија