Што се менува во април во Германија носи низа промени кои ќе влијаат на секојдневниот живот на граѓаните. Новиот месец носи зголемување на платите, нови здравствени права, технички стандарди и построги правила во одредени области.
Повисоки плати во јавниот сектор
По договорот меѓу синдикатите и работодавачите, околу 925.000 вработени во јавниот сектор ќе добијат зголемување на платите од 1 април.
Платите растат за 2,8 проценти, а најмалку за 100 евра.
Оваа промена се однесува на 15 од 16 сојузни покраини, додека Хесен преговара одделно.
Нови прегледи за рано откривање рак на белите дробови
Од април се воведува право на годишен бесплатен преглед за рано откривање на рак на белите дробови.
Прочитајте: Високообразувани медицински сестри во Германија: што значи тоа за пациентите и системот?
Право имаат активни и поранешни пушачи на возраст од 50 до 75 години, а прегледот се врши со нискодозна компјутерска томографија. Трошоците ги покрива здравственото осигурување.
Поради дополнителни услови за лекарите и радиолозите, можно е на почеток да има проблеми со термини.
USB-C станува задолжителен и за лаптопи
Од 28 април сите нови лаптопи во Европската унија мора да имаат USB-C приклучок за полнење.
За помалите уреди оваа обврска беше воведена уште на крајот на 2024 година, додека лаптопите имаа подолг преоден рок.
Забрана за диазотен оксид за малолетници
Од 12 април на малолетниците им се забранува купување и поседување на диазотен оксид, познат како „гас за смеење“.
Се забранува и негова онлајн продажба, како и продажба преку автомати. Се воведуваат и построги правила за хемикалии кои се користат како т.н. „капки за онесвестување“.
Субвенции за полначи за електрични возила
Се започнува нова програма за поддршка за инсталација на полначи за електрични возила во станбени згради.
За оваа намена се обезбедени 500 милиони евра, а субвенциите може да изнесуваат до 2000 евра по полнач. Пријавувањето започнува во средината на април.
Промени за корисниците на кредитни картички
Корисниците на програмата „Miles & More“ ќе мора да преминат на нова кредитна картичка.
Досегашните картички ќе престанат да важат до крајот на април, а за новата картичка ќе биде потребна нова апликација и проверка на кредитната способност.
Дополнителни промени во регионот
Во Швајцарија се воведува забрана за користење пиротехника на јавни места, додека во Австрија трговците ќе мора јасно да ги предупредуваат купувачите за намалување на количината на производите без намалување на цената.
Во Европската унија се воведува и нов дигитален систем за контрола на влез, кој вклучува собирање биометриски податоци.
