Германската железница во длабока криза: Доцнењата станаа секојдневие, а вистинските подобрувања ќе се чекаат со години
Германија со децении беше синоним за точност, организираност и сигурен јавен превоз. Но, во последните години токму железницата стана една од најголемите фрустрации за жителите и посетителите на земјата. Доцнењата на возовите повеќе не се исклучок, туку правило, откажувањата на поаѓања се случуваат речиси секојдневно, а патниците сè повеќе ја губат довербата во Deutsche Bahn.
Последниот голем прекин на железничкиот сообраќај дополнително покажа колку е ранлив системот. За време на планирано одржување на застарената железничка комуникациска мрежа GSM-R, дошло до технички дефект поради кој диспечерите и машиновозачите ја изгубиле можноста за меѓусебна комуникација. Последица од тоа беше целосен прекин на железничкиот сообраќај низ цела Германија во текот на ноќта, при што илјадници патници останаа заглавени на железничките станици.
Во исто време, железницата се подготвува и за нов проблем. Поради сè почестите топлотни бранови и температурите што надминуваат 40 степени Целзиусови, се зголемува ризикот од дефекти на шините, свртниците и климатизациските системи во возовите. Deutsche Bahn дури им понуди на патниците можност бесплатно да ги откажат одредени патувања поради најавените екстремни горештини – нешто што досега речиси никогаш не се случувало. Но, временските услови само дополнително ги открија многу подлабоките проблеми што се наталожувале со децении. Пишува DW.
Прочитјте: 5 начини како да го вратите мирот по напорниот работен ден
Точноста на возовите е на најниско ниво
Според официјалните податоци, само околу 60 проценти од меѓуградските возови пристигнуваат навреме. Но, ниту оваа бројка не ја прикажува вистинската состојба.
Имено, во статистиката за доцнења не влегуваат возовите што се целосно откажани, ниту оние што поради проблеми воопшто не стигнуваат до крајната дестинација. Дополнително, Deutsche Bahn смета дека возот доцни само ако пристигне најмалку шест минути по возниот ред.
Тоа значи дека реалната доверливост на железничкиот сообраќај е уште полоша отколку што покажуваат официјалните податоци. За патниците тоа значи пропуштени преседнувања, доцнење на работа и сè помала доверба во железницата како сигурно превозно средство.
Кризата трае со децении
Проблемите на Deutsche Bahn не настанале преку ноќ. Нивните корени се уште од периодот по обединувањето на Германија, кога биле споени железничките системи на тогашна Западна и Источна Германија.
Голем дел од тогашните инвестиции бил насочен кон изградба на поединечни брзи железнички линии што требало да ги поврзат истокот и западот на земјата. Сепак, поголемиот дел од постојната железничка мрежа останал речиси непроменет, иако уште тогаш барал темелна модернизација.
Во исто време, Deutsche Bahn останал во државна сопственост, но од компанијата се очекувало да работи како приватна фирма што мора да остварува профит. Таквиот пристап имал долгорочни последици.
Наместо големи инвестиции во одржување и обнова на инфраструктурата, приоритет станале финансиските резултати. Многу проекти за одржување биле одложувани или изведувани во минимален обем за да се намалат трошоците.
Погрешните одлуки од минатото денес скапо се плаќаат
Еден од клучните моменти се случил на почетокот на 2000-тите години, кога тогашното раководство, предводено од Hartmut Mehdorn, сакало да ја подготви Deutsche Bahn за излегување на берза.
За компанијата да изгледа попривлечно за инвеститорите, биле спроведени големи намалувања на трошоците. Значително бил намален бројот на вработени, се продавал имот, а инвестициите во железничките линии, мостовите и сигналните системи биле сведени на минимум.
Наместо вложувања во железничката инфраструктура, акцентот бил ставен на развојот на меѓународниот логистички бизнис, кој требало да носи поголема заработка.
Но, планот не успеал. Финансиската криза во 2008 година го запрела излегувањето на Deutsche Bahn на берза, додека железницата останала со огромни долгови и инфраструктура што продолжила да пропаѓа.
Голем дел од мрежата е стар повеќе од еден век
Денес германската железничка мрежа опфаќа околу 33.400 километри пруги.
На бројни делници сè уште се користат сигнални уреди, свртници и инфраструктура што потекнуваат од 19 век. Таквиот систем е исклучително чувствителен на дефекти, а секој технички проблем многу брзо предизвикува синџир на доцнења низ голем дел од мрежата.
Поради тоа, реконструкциите станаа неизбежни. Но, токму тие дополнително го забавуваат сообраќајот и создаваат нови проблеми за патниците.
„Stuttgart 21“ стана симбол на проблемите
Еден од најпознатите примери е проектот Stuttgart 21.
Подземната железничка станица требало да биде завршена уште во 2019 година. Сепак, рокот повеќепати бил одложуван, а сега како можен датум за завршување се споменува 2031 година.
Трошоците за проектот се повеќе од двојно зголемени, додека за време на работите се појавиле бројни технички проблеми, меѓу кои погрешно поставени кабли, проблеми со безбедносните системи и предизвици поврзани со дигитализацијата.
Проектот што требало да ја претставува модерната германска железница денес многумина го сметаат за симбол на сите проблеми на Deutsche Bahn.
Следува најголемата обнова во историјата
За конечно да се подобри состојбата, Deutsche Bahn го започна најголемиот инфраструктурен проект во својата историја.
Планот предвидува до крајот на деценијата да бидат обновени околу 4.200 километри од најважните железнички линии.
Проблемот е што работите не можат да се изведуваат без затворање на пругите. На одредени делници сообраќајот ќе биде целосно прекинат со месеци, а возовите ќе сообраќаат по обиколни рути што ќе ги продолжат патувањата за еден до еден и пол час.
Тоа значи дека патниците уште со години ќе ги чувствуваат последиците од реконструкцијата пред да ги видат првите сериозни подобрувања.
Модернизацијата нема да биде брза
Првите обновени делници веќе се завршени, но ниту тие не поминаа без проблеми.
Обновата на пругата меѓу Франкфурт и Манхајм траеше пет месеци, а трошоците ги надминаа првичните проценки. По завршувањето на работите беа обновени железничките станици, сигналните системи и заштитата од бучава.
Слични големи проекти следуваат и на други важни линии, вклучувајќи ги врските меѓу Берлин, Хамбург и Хановер, поради што патниците ќе мора да сметаат на нови доцнења и подолги патувања.
Патниците ќе мора уште долго да бидат трпеливи
Во Deutsche Bahn повеќе не ја кријат сериозноста на ситуацијата. Раководството отворено признава дека пред состојбата да се подобри, таа најпрво дополнително ќе се влоши.
Обновата на инфраструктурата, која со децении беше запоставувана, бара години работа, огромни инвестиции и привремени затворања на пругите. Дополнително, потребно е да се модернизира и застарениот комуникациски систем, кој и понатаму во голема мера се темели на технологија што многу европски земји одамна ја напуштиле.
Сето тоа значи дека доцнењата, откажаните возови и честите измени на возниот ред уште со години ќе бидат дел од секојдневието на патниците во Германија. Дури по завршувањето на најголемиот дел од планираните реконструкции, германската железница би можела повторно да стане превоз каков што граѓаните некогаш го паметеа.
Текстот е авторска сопственост и неговата содржина не смее да се превзема во целост или делови без претходна согласност од авторот или порталот Емигрико.
