Во Германија повторно се отвора прашањето дали повозрасните лица кои ќе останат без работа треба и понатаму да имаат право подолго време да примаат Arbeitslosengeld. Во фокусот е можноста максималниот период за исплата на надоместокот да биде ограничен на 12 месеци, без оглед на возраста.
Според пресметките на Institut für Arbeitsmarkt- und Berufsforschung (IAB), ваквата промена би можела значително да ги намали расходите за осигурување во случај на невработеност. Доколку максималното времетраење на Arbeitslosengeld се ограничи на една година, годишната заштеда би изнесувала најмалку 2,4 милијарди евра.
Потенцијалниот финансиски ефект би можел да биде уште поголем. Доколку пократкиот период на примање надоместок ги поттикне невработените побрзо да најдат ново работно место, според проценките заштедите би можеле да надминат четири милијарди евра годишно.
Какви се правилата во моментов?
Според сегашниот систем, максималното времетраење на Arbeitslosengeld не е исто за сите. Покрај исполнувањето на потребните услови и претходниот период на осигурување, важна улога има и возраста на невработеното лице.
Прочитајте: Голема куќа во Македонија, мал стан во Германија: За кого всушност градиме?
Лицата помлади од 50 години можат да примаат Arbeitslosengeld најмногу 12 месеци. За лицата на возраст од 50 до 54 години максималниот период може да достигне 15 месеци, додека за оние меѓу 55 и 57 години надоместокот може да се исплаќа до 18 месеци.
Лицата кои имаат најмалку 58 години, доколку ги исполнуваат потребните услови, можат да имаат право на Arbeitslosengeld до 24 месеци.
Токму овие подолги периоди за повозрасните невработени би биле засегнати доколку максималното времетраење навистина се ограничи на 12 месеци.
Заштедата не мора да значи и помали трошоци за државата
IAB истовремено предупредува дека финансиската пресметка не е толку едноставна. Повозрасните лица кои ќе останат без работа во просек потешко се враќаат на пазарот на трудот и често им е потребно повеќе време за да најдат соодветно ново работно место.
Ако правото на Arbeitslosengeld им заврши порано, дел од нив би можеле да преминат на Grundsicherung доколку ги исполнуваат условите. Во таков случај, дел од планираната заштеда не би претставувал вистинско намалување на јавните расходи, туку префрлање на трошоците од еден дел на социјалниот систем во друг.
Прашањето е особено чувствително за луѓето кои работеле и плаќале придонеси со децении, а остануваат без работа непосредно пред пензионирање. Токму за нив сегашниот систем предвидува подолг период на финансиска заштита.
Засега нема одлука за кратење
Важно е да се нагласи дека во Германија во моментов не е донесена одлука Arbeitslosengeld да се ограничи на 12 месеци за сите невработени.
Станува збор за анализа и можен модел за промена на системот, кој повторно ја отвора пошироката дебата за трошоците на социјалната држава, поттикнувањето на побрзо враќање на пазарот на трудот и заштитата на повозрасните работници.
Доколку ваков предлог во иднина стане конкретна политичка мерка, најголемата промена би ја почувствувале токму лицата над 50 години, а особено оние над 58 години кои според сегашните правила можат да добиваат Arbeitslosengeld до две години.
Што мислите вие: дали човек кој работел и плаќал придонеси во Германија со децении треба да има право на подолга финансиска заштита ако остане без работа на 55 или 60 години, или максималниот период треба да биде ист за сите?
Текстот е авторска сопственост и неговата содржина не смее да се превзема во целост или делови без претходна согласност од авторот или порталот Емигрико.
