Многумина во коментари на фејсбук истакнуваат дека проблемот не е во Германија, туку во луѓето и нивните навики.
На социјалните мрежи во изминатите денови се разви жестока расправа околу исплатливоста на заминувањето во Германија и околу тоа колкава плата е доволна за достоинствен живот.
Сè започна со објава на еден работник од Македонија, кој порачува:
„Ајде, те молам, напиши таму за овие што сакаат да одат во Германија дека не им се исплати да доаѓаат под плата од 3.500 евра. Можеш ти да работиш и за 2.700 евра, но тоа е робија! Јас чекам да го отплатам кредитот и назад во Македонија – доста ми е од сè!“
Неговиот став предизвика многу коментари – од поддршка до остри критики.
„И во Македонија ќе работиш за 700 евра“
Еден од коментарите гласи:
„А во МК нема да работиш за 2.700, туку за 700 евра. Првите плати веднаш дигате кредити за да купите автомобил, па после кукате како ви е тешко…“
Друг додава:
„Кој ти рече да земаш кредит? Сам си крив. Да беше толку лесно, секој ќе земаше.“
Живеење над можностите
Многу коментатори истакнуваат дека проблемот не е во Германија, туку во луѓето и нивните навики.
„Германија не е виновна, вие сте виновни што ви се алчни очите и сакате повеќе отколку што можете, па живеете и трошите над своите можности. И да ви е платата 5.000 евра, пак ќе преживувате од месец за месец!“ – пишува еден корисник.
Особено се критикувани оние кои веднаш по доаѓањето купуваат скапи автомобили, телефони и луксузни работи, а потоа живеат во долгови.
„Првите три плати – па кредит за автомобил од 50.000 евра, Гучи, Прада, нов iPhone… А потоа три недели паштета за појадок, ручек и вечера. Сите се виновни, само ти не си!“ – стои во еден од коментарите.
„Може да се живее нормално“
Сепак, има и поинакви искуства. Еден македонец кој живее во Минхен веќе 12 години тврди дека со 2.700 евра месечно може нормално да живее, без кредити и долгови.
„Гарсониерата ја плаќам 850 евра, за храна трошам 600 евра, не возам автомобил туку користам јавен превоз. Немам кредити ниту минуси. Патував низ половина Европа и Канада и сè уште заштедувам. Сè е прашање на мера и начин на живот, а не на Германија.“
Расправата завршува со мислење што многумина го поддржаа:
„Проблемот е во нас, а не во висината на платата. Кога ќе се покриваш онолку колку што ти е долг јорганот, дури тогаш ќе бидеш задоволен од животот – било во Германија или во Македонија.“
Текстот е авторска сопственост и неговата содржина не смее да се превзема во целост или делови без претходна согласност од авторот или порталот Емигрико.
